"Ape Aje Segala Dikomen!" Budaya Nyeletuk Orang Betawi yang Bikin Baper Sekaligus Ngakak
Abang, Mpok, pernah kagak ngerasa risih gara-gara dikomenin melulu sama sodara atawa tetangga? Baju kegedean dikomen, rambut klimis dikomen, sampe cara duduk aje kena komen. Nah, ini emang salah satu budaya khas yang kental banget di kalangan orang Betawi.
Orang Betawi tuh emang demen banget nyeletuk soal apa aje yang keliatan. Bukan gara-gara jahat atawa sengaja nyari-nyari kesalahan, tapi emang udeh jadi kebiasaan turun-temurun buat "kepo" soal keadaan orang di sekitar. Istilahnye, nanya kabar ame nyeletuk dikit itu udeh jadi bagian dari basa-basi sehari-hari.
Kadang komenannye emang bikin baper sesaat, kayak dibilang "kek plastik obat" gara-gara pake baju biru nyala, atawa "kek cakwe kesorean" gara-gara demen nyender-nyender. Tapi kalo dipikir-pikir lagi, ini semua bagian dari cara orang Betawi nunjukin perhatian, walaupun caranye emang unik dan kadang bikin ketawa sendiri.
Yang bikin unik, budaya nyeletuk kayak gini kagak cuma buat orang laen, tapi juga sering ke sesama keluarga sendiri. Anak ditanya mulu ampe dibilang kayak wartawan, atawa bocah maen di rumah dibilang berisik tapi maen di luar dibilang bahaya. Serba salah emang, tapi itulah keseruan idup di lingkungan Betawi.
Jadi kalo lu orang Betawi dan sering kena komenan kayak gini, jangan langsung baper duluan. Anggep aje ini bagian dari keakraban khas kampung yang emang kagak bisa dipisahin dari kesehariannye. Lagian, seru juga kan jadi bahan candaan, asal jangan sampe kebablasan jadi nyinyir beneran.
Posting Komentar